فــــوضـــى مـــرتــبـــة

مش معقول شو قوية أنا بعرف!

بس اللي ما بيعرفوا لهلأ مين قواني

و شو قواني

كل الهوا اللي بيني و بينه

صوت الولا شي عم بوسوس بداني

خلاني قوية...

مبارح مثلا، أمي غفيت حاضنة المصحف على صدرها الحديد

و لو شو ما صار، ولو البحر يندلق على القمر

ما بتصحى

لو مش قوية، مثلا، كان اعتبرت حالي منفية

و لجأت لأوطان محتلة بدخان وجبين صبية لسة مزين تلالها

وحدو هوي بصحيها...

لما بيجي سارق وش و مع هيك بتعرفه

من وين جايبة هالقوة؟

تحت أضافري في نجوم الروضة وكل الرجفات

من وقت ما كنا بالصف العاشر

بخبي دنيا غير الدنيا تحت رسمة

هيك أنا قوية!

عشان غزل البنات بدوب

وما بعرف شو أحكي لأختي لما يدوب...

لازم تشوفني قوية